IMPACT
Combat-sports Academy
BARNANÁMSKEIÐ
BARNANÁMSKEIÐ Á REYÐARFIRÐI
HAUSTÖNN 2024
Þar sem barnanámskeiðin 2021 og núna í vor 2024 vöktu mikla lukku, langaði okkur að bjóða upp á samskonar námskeið núna í haust, með smávægilegum breytingum.
Þróun barnanámskeiðanna
Um er að ræða frumkvöðlastarf sem byggir á samstarfi Sigurgeirs Svanbergssonar, yfirþjálfara ICA á Reyðarfirði, og sexfalda heimsmeistarans í Lethwei, Dave Leduc. Barnanámskeiðin núna í vor voru þau fyrstu á heimsvísu sem kortlögð voru og hönnuð undir Leduc Lethwei bardagaskólanum og því um einstakt tilraunaverkefni að ræða. Lethwei bardagalistin á sér rætur að rekja til hnefaleika sem stundaðir voru í Búrma (Myanmar) (e. burmese boxing) og nær að minnsta kosti 2000 ár aftur í tímann. Þrátt fyrir langa sögu, er stutt síðan Lethwei náði heimsfrægð. Í sameiningu hafa Sigurgeir og Leduc sérsniðið barnvænt æfingaprógram sem lét á reyna í vor og sem við viljum gjarnan fá tækifæri til þess að þróa áfram núna í haust.
_JPG.jpg)
Sigurgeir Svanbergsson (vinstri) og Dave Leduc (hægri)
Okkar stefna
Við höldum fast í ákveðin gildi líkt og margar aðrar bardagaíþróttir. Hornsteinar í allri okkar þjálfun eru agi, umhyggja, virðing og ábyrgð, ekki bara gagnvart öðrum heldur líka gagnvart okkur sjálfum. Þannig fá börnin ekki bara þjálfun í að koma vel fram við hvort annað (umhyggja og virðing) heldur læra líka að treysta á eigin getu og þrótt (agi og ábyrgð). Við teljum slíkan lærdóm mikilvægan grunn að þeirri hæfni að setja sér og öðrum skýr mörk. Þessi námskeið munu þannig fyrst og fremst leggja áherslu á virðingu fyrir sjálfum sér og öðrum, vináttu, frábæra skemmtun og heilbrigða hreyfingu.
Tákn Lethwei
Börnin munu þjálfa undir glæsilegum erni sem er einkennistákn íþróttarinnar. Í Lethwei tíðkast sú rótgróna hefð að tveir aðilar kasti á hvorn annan kveðju í upphafi bardaga sem kallast Lekkha Moun. Með þessari kveðju skora þeir hvorn annan á hólm af virðingu og hugrekki. Kveðjan sjálf er röð hreyfinga sem framkvæmdar eru til þess að líkja eftir kraftmiklum vængjaslætti arnarins.
Fyrirkomulag - Haustönn 2024
Áfram verða tveir aldurshópar og verður eldri hópurinn nú teygður upp í 13 ára. Yngri hópur (U9) samanstendur þannig áfram af 6-9 ára og sá eldri (U13) af 10-13 ára.
Fyrsti tími annarinnar hjá báðum hópum verður sunnudaginn 15. september 2024 og lýkur sunnudaginn 15. desember 2024. Gera má ráð fyrir að í enda annar verði haldin viðurkenningaathöfn eins og síðast og eru foreldrar hvattir til þess að mæta.
ÞJÁLFARAR BARNANÁMSKEIÐA - HAUST 2024
Axel Gauti
þjálfari U9
Daníel Örn
þjálfari U13
Þorsteinn Árni
Aðstoðarþjálfari U9 og U13
Hægt er að skrá barn/börn sín á námskeiðin með því að fylla út skráningarformið hér fyrir neðan.
Skráning á barnanámskeið Reyðarfjarðar
Haustönn 2024
Staðfesting á skráningu berst í tölvupósti, vinsamlegast gangið úr skugga um að tölvupóstfang sé rétt skrifað.
Undir skráningarforminu er fyrirspurnarform. Hægt er að óska eftir frekari upplýsingum um námskeiðin (t.d. varðandi æfingaprógramið og verðskránna) með því að fylla út fyrirspurnarformið neðst á þessari síðu.
Skráningarskilmálar
Foreldrum/forráðamönnum ber skylda að upplýsa þjálfara til fullnustu um allar þær sérþarfir sem börn þeirra kunna að hafa. Í þessu felst að greina þjálfurum með skýrum hætti frá öllum þeim atriðum sem foreldrar/forráðamenn telja mikilvægt að komi fram áður en þjálfun hefst. Það er á ábyrgð foreldra/forráðamanna að ákveða hvaða upplýsingum skal deilt með þjálfurum og í öllum tilfellum er fullum trúnað heitið. Komi í ljós á einhverjum tímapunkti, að nauðsynlegar upplýsingar liggja ekki fyrir hendi, áskilur ICA sér rétt til að hafna inntöku barns á námskeiðin.
Hafa ber í huga að þekking þjálfara einskorðast við kennsluefni félagsins, hún fer ekki inn á önnur fagleg svið. Fari sérþarfir barns yfir kunnáttusvið þjálfara, með þeim afleiðingum að ekki er hægt að koma til móts við þarfir barnsins á meðan þjálfun stendur, áskilur ICA sér sömuleiðis rétt til að hafna inntöku. Þetta er eingöngu gert með hagsmuni barnsins í huga.
Vinsamlegast útlistaðu allt sem þér finnst mikilvægt að þjálfarar séu meðvitaðir um í reitinn "Athugasemd" hér fyrir neðan.